Свидетельство от святых писаний о печати антихриста

«Всяк берегись принять сие знамение; 

ибо все таковые осуждены будут со зверем в езеро огненное».

(Книга «ЦВЕТНИК ДУХОВНЫЙ» на церковно-слав. языке, изд. 1863 г.)

ГЛАВА 14

СВИДЕТЕЛЬСТВО ОТ СВЯТЫХ ПИСАНИЙ, О КУПЛИ И ПРОДАЯНИИ.

Яко во время пришествия последняго антихриста, правоверным християном, несть возможно будет что купити или продати: печати ради его скверныя, яже имеющая быти во образе антихристове, и имени того.

Кая имать существовати во всех его делах, душевных и телесных, по свидетельству Иоанна Богослова, и прочих Святых. О чесом да зрит кийждо в нижеследующей сей главе. 

О ЗАЩИЩАЮЩИХ ИМЯ

антихристово, и образ его.

Апокалипсис печатный: зачало: 42, лист: 65.

О Ангеле третием утверждающем верныя еже не прияти антихриста.

И третий Ангел последова им, глаголяй гласом велиим: аще кто поклонится зверю и образу его, и приемлет начертание на челе своем, или на руце своей: и той имать пити от вина ярости Божия, в чаши вина нераствореннаго. И будет мучен огнем и жупелом пред Ангелы Святыми, и пред Агньцем. 

Ниже: И не имут покоя во дне и в нощи кланяющиися зверю и образу его, и аще кто приемлет начертание имени его. 

Ниже: от толкования. Нощь же, мучение сквернавых еже получат образующии диявольская деяния и на Христа хулы, имиже деют, сиречь, живопишуще образ отступника зверя, и имя сего в своих сердцах безчестное яко честное начертавающе.

О том же: из Апокалипсиса старописменнаго, глава: 42. От толкования.

День и нощь глаголет: ниже: Но день Святых Вечный Живот разумеваем. А нощь нечестивых страсть есть. Юже приимут творящии диявольская дела. И Христа хуляще. Антихристово же имя, яко честно на своих сердцах написующе.

Там же: зачала, 61.

И иже не поклонишася зверю, ниже образу его, и не прияша начертание его на челе или на руце своей: и жиша и царствоваша со Христом тысящю лет. 

Там же зачало, 45.

И видех яко море стклянное, смешено со огнем, и победивша зверя, и образ его, и начертание его, и число имени его, стояшыя на мори стклянном, имуще гусли Божия.

Апокалипсис трех толковой, стих: 184. От инаго толкования.

Над сим бо морем виде Евангелист стояща избегших от зверя и образа его, и начертания его, и от числа имени его. Имущих гусли Божия. Что же творяху стояще над сим волнящимся мори? Пояху песнь Моисеову раба Божия, и песнь Агньчу.

Патерик египетский, слово Кирила философа, о последних днех.

Сопротивнаго же раби, и пленницы дияволи, иже поклоньшеся антихристу, и скверное имя его в сердцах своих вписавше, и пагубную печать того приемлюще, Небеснаго упования и Славы Божия лишени суть.

Апокалипсис печатный: зачало: 30, лист: 49. От толкования.

Пред постижени единощи глаголет дивами ложными антихристовыми, и богомерзкое его имя не истребленне в сердцах вписавшии от июдей же и от язык: погребсти убо Святая телеса возбранят. Там же: зачало: 37. лист: 62. Да никто же может купити или продати, разве имеяй начертание, имя зверево, или число имени его. 

Ниже: от толкования.

На десных убо руках, да десных и благих дел отсечет действо. На челех же, да научит в лести и тме прельщенныя дерзати. Но не приимут его знаменанныи на лицах Божественным светом. И число же зверя распространяти везде начнет, в куплях же и продаяниях. Да не приемшим сие от оскудения нуждных, насильная смерть приидет.

О том же: Апокалипсис древлеписменный, слово, 12, глава: 37, стих: 6160.

О купли и продаянии: сущие.

Да никтоже возможет ни купити ни продати, токмо кто ихъ имать начертание, или имя зверя, или число имени его. Ниже: от толкования.

И начертание же пагубнаго имени отступника на вся наложити потщится. На десницах же, да добрых дел отсечет детели. А на челох, да вольстится им. И научит прельщенныя тьме и льсти. Не приимут же иже знаменавшиися Божиею печатию в лица своя. И число зверино начнет распространятися в куплях и продаваниях. Да иже сего неприимет, от потребныя нужды смерть приимет.

Из книги старописменныя, Преподобнаго Максима Грека, слово, 8. На Маомефу, и на агарянскую прелесть. 

Аще и начертание начертаеш на челех и на десней руце их, яко не имущему е, ниже продати мощно, ниже купити. Но наставшу времени прелести и явления сына погибельнаго содеяна всяко, тогда будут, и та судьбами Божиими неизглаголанными наследником и совершителем твоего богоборнаго нечестия.

Из книги старописменныя толкование Блаженнаго Ипполита Антиохийскаго, на Пророка Даниила, глава, 11.

Тогда будет скорбь и туга великая, якова же не бысть от сложения мира. Бегающим бо тогда и не покаряющимся мучителю, от востока на запад, и от запада на восток. Иным же крыющимся, по горам и по пещерам. Всюду же их мучителю гонящу своим повелением и погубляющу. И не могущим бо им продати что от своих, ни купити, аще не имать зверинаго знамения на руце десней, или на челе своем. Вси бо тогда от своего места изгоними будут. От домов своих, и от градов своих, и в темницах затворяеми, и всякою мукою мучими. Да есть же ведомо, яко тацей бури не во едином месте, но во всем мире быти хотящей. 

Книга старописменная, именуемая Андриатис, слово Святаго Иоанна Златоустаго, о последних днех, и о антихристе. лист: 333.

И попустит дух нечистый велию лесть на безводныя, и всякими коварствы ловя и прельщая их овых лестию, овых страхом. И помрачатся и потемнеют вси. И будет печать его и знамение во всех, да никто же ни купит, ни продаст, без его печати.

Книга о Месии Правдивом, пророчество, 18, лист: 133.

Разглагольствие жидовина с християнином.

Вопрошает жид християнина.

Антихриста самого зверем великим и страшным, предотечю же антихристова пророка фальшиваго, зверем меньшим, Апостол ваш Иоанн называет, о предотечи антихристовом и о самом антихристе мовячи: Сотворит вся малыя и великия, богатыя и убогия, свободныя и работныя, да даст им начертание на десней руце их, и на челе их, да никтоже возможет ни купити, ни продати, токмо кто имат начертание, или имя зверя, или число имени его. Какое же то будет пятно антихристово? которое слуги его на руце правой и на челех своих будут носити.

Ответ християнина.

Некотории разумеют, иже те литеры яковыя антихрист кажет выпалити, на правой руце, альбо на челе веруючим в него, а то для приказания божияго, в книгах девтеромионовых жидом поданнаго: возложи я в знамение на руку твоею, которое жидове попросту разумеючи, приказание Божие на карточках написанное, в руце своей носили. Но иньшии глаголют: еже троякое будет пятно антихристово, которое слуги его на руце правой, и на челе своем будут имети, Первое пятно: образ властный антихристов вымалиованный. Другое пятно: имя его властное, литерами выраженное. Третие пятно: литеры, который вкратце число имени его, будут в себе замыкати: 666. и кождый богатый и убогий, великий и малый, волный и невольник, мусит на руце правой, альбо на челе своем, з тых трех яковое человек пятно антихристово, любо едино имети бо не маючи того пятна, ни кто ни может ни продати ни купити ничего.

Сему же согласно свидетельстует, и в Цветнике старописменном о антихристе, писанный в царствование Алексея Михайловича, в лето, 7174 (1666), во главе, 14. на лист: 94. где помещается Сказание Зиновия Мниха ко ученику своему о прелести антихристовой. и в конце слова глаголет сице:

Вопрос: Которыя умыслит печати?

Ответ: Первое, воздвигнет лютое гонение на православныя християны, да ни ктоже не имать где главы подклонити, и егда же не может преодолети сильных, тогда повелит слугам своим престати от мучительства: и повелит ину заповедь творити, да вси поне волею приимут: еже есть сия, первое повелит творити некая писмена на карточках, с тайным именем, да без тех не могут путь шествовати: и да на тое глядячи ведоми будут, и безбеды путь пройдут. Второе: имя свое имать писати, егоже никтоже уведает от земных: сими словесы, 666. Третие: в куплях и продажах печать его будет распространятися: овии же волею приимут печать его без мучения и без нужды. а не хотящия же сего прияти, от потребныя нужды смерть приимут.

Дозде свидетельство от древних о купли и продаянии.

Сему же согласно свидетельствуют и новии учители, о купли и продаянии. Яко во время пришествия последняго антихриста правоверным християном несть возможно что будет купити, или продати, печати ради его скверныя.

О чесом зри нижеследующие доказательство: из книги нарицаемая победная повесть, сочинение Бенгелево, в прибавлении на Откровение Иоанна Богослова, страница 383.

О знамении зверя на челе и на руке.

Дабы вовсе истребить Християнство, так чтобы и потаенных християн не было, каждый отрекающийся Христа должен будет; во свидетельство своего отречения, носитъ на себе определенный знак: кто же сего знака не приимет, тот лишен будет всех прав гражданина и свободы, и подвергнется жесточайшему гонению. Тогда всяк берегись принять сие знамение; ибо все таковые осуждены будут со зверем в езеро огненное. Тогда будет страшное время, скорбь, якова не бысть от начала мира: но претерпевый до конца, получит за свою верность такую награду, какая и на сердце его не всходила.

Третий признак наконец есть число зверино, которое должно означать тоже, что и знак на руке и на челе. Будет ли сие число подлинно заключатся в имени человека беззакония, или знаменовать год его правления, сие все равно и в свое время мы узнаем лучше; теперь же довольно с нас знать и то что естли сие число каким нибудь образом будет служить знаком отречения от Христа и Християнской Веры: то християнин должен лучше согласится пожертвовать жизнию, нежели принять оное. 

Пока сих трех знаков мы не видим, до тех пор человек беззакония еще не открылся; и великий грех какого либо государя почитать за сего ужаснаго человека, естьли не есть подлинно он.

Там же: глава, 5. страница: 408.

Истинные християне воздвигнут главы свои, станут бодро пред лицем человека беззакония, ополчатся терпением, мужеством и постоянством, и во бдении и молитве будут ожидать помощи от Спасителя своего: отступники же не усумнятся поклонится человеку беззакония. Но будут и такие, которые захотят внутренно оставатся християнами, но из страха станут поклонятся зверю наружно, и приимут на руку и на чело свое начертание его, и за то сохранят гражданскою свободу, право покупать, и продавать, торговать своими изделиями и избытками и избавятся от гонения. Однако участь сих бедных будет ужасна: ибо в сие последнее очистителное испытание нельзя будет двоится. Но или будь Христов; или Велиаров: или гражданин Новаго Иерусалима, или обитатель езера огненнаго.

Там же, глава 6, страница 413.

Как же скоро откроется человек беззакония, и явится великим монархом. Ниже: и все кто не поклонится образу зверя и не приимет на руку и на чело начертание его, лишат чести; гражданской свободы, и право покупать и продавать. В сем искушении многие учители и наставники, почитаемые за святых, не устоят, и жребием их будет езеро огненное.

Там же: глава: 13. стих: 16. страница: 201.

И сотворит вся малыя и великия, богатыя и убогия, свободныя и работныя, да даст им начертание на десней руце их, или на челе их. Ниже: От толкования: Все обращенные к поклонению зверю, знатные и простолюдины, богатые и бедные, благородные и рабы, получат знак принадлежности ему, или право зверинаго гражданства, и будут иметь сей знак собственно будет, сие еще сокрыто. 

(Источник: Книга «ЦВЕТНИК ДУХОВНЫЙ», изд. 1863 г., стр. 125-134)

II

«Зрите, братие, аще и много понудят вас печать или карту прияти, то аще и кров пролияти, или имение лишитися, то с радостию притерпите, точию не мозите поклонитися многоперстой их прелести».

(Книга «Цветник Духовный», [малый сборник], изд. XVII-XVII в)

Книга Зеновия Мниха. 

Глава 14 «О антихристе»

 

 

Вопрос: Которами хощет вещьми увезати ум человеч сопротивник Божий? 

Ответ: Сими вещьми имать егда видят непреоборимы его коварствы и различными напастьми, тогда повелит слугам своим да дадят им три печати да не без единой быти могут. И тако волею приидут поклонитися ему. 

Вопрос: Которыя умыслет печати? 

Ответ: Первое воздвигнет гонение на православных христиан, да не имут где главы подклонити. И егда не может сильных преодолети тогда повелит слугам своим престати от мучительства и повелит им ину заповедь творити, да вси поне неволею приимут, еже есть сия. Повелит творити некая писмена на картачьках с тайным именем, да без тех не могут путь шествовати, да на тое глядя ведоми будут, и без беды пройдут камо хотят. Второе имя свое тайно имать, писати егоже никтоже уведает от земных сими словесы, 666. Третие в куплях и продаяниях печать его имать распространяться овии волию приимут печать его без мучения и без нужды не хотящии его прияти, от потребныя нужды смерть приимут. 

Вопрос: Может ли избыти от сея печати поне хотя малии? 

Ответ: Малии нецыи якоже рекл еси, не обезавшыяся суетами мира сего, но оплевавше сласти и красныя мира сего, нове мира живуще, тех не прельстит сопротивник.

Апокалипсис печатаной… 

об антихристе.

Имени же его не яви, но число имени его, 666: антихристово. Стр. 111: пятно, на картачьках написанное будет, и на руках носимое троякое, которое слуги его на руце правой и на чале своем будут иметь. 

Первое пятно значит, образ антихристов вымалеваный. 

Второе, пятно значит имя его властное литерами выряженное. 

Третие пятно значит литеры, которое вкратце лечьбу имени его будет в себе замыкать, 666. Тако антихрист людем пятно свое будет давати, дабы на тое пятно глядучи каждый познал иже суть слуги антихристовы. 

Глава 15. Мера пшеницы за динарь, и три меры ячьменя за динарь, и елей и вино не вреди. Аще кто волию, или неволию от веры отступят, антихристу поклонятся всем равная мука будет. Пшеница значит законне подвизающихся, а ячмень по смущении покаявшихся равная цена, динарь, сиречь воздояние. а вино и елей цельба покаяние до века будет. Аще бы и запечатаны покаялись и то бы простил Бог, но не покаются но отчаются. Указ сему: 

Книга Тифология, глава 16. Опасатися трех вищей, зверинаго образа карточик, и наипаче всего душепагубныя печати, понеже ей несть покаяние, погибе таковый от Бога и человек. Глаголет Господь, и тако прельстившеся вси погибнут без обращения яко Июда предатель егоже истребит Господь от Книг Животных. Того сатана вписует во сваю ему всегубительную книгу яко Июду. Егоже покаяния аще и поиска Господь, но той место покаянию не остави: тако и сии, понеже отвергошася Святыя Соборныя Церкви в животе своем. 

Пророк Иеремия. В тыя дни глаголет Господь, взыщется грех не обрящется, яко милостив буду им.

Тифология. Тако глаголет Господь, в та времена точию, аще кто призовет имя Мое спасется; не ищи иныя исправы или священства, но точию яко же Святый Апостол Петр, по отречении своем, вверже себе в ров, и плакася горко дондеже Христос воскресе от мертвых, тако да творят иже ся прельстит, в прелести антихристовой, да плачется горко петровым покаянием, дондеже Господь приидет, судити живым и мертвым, тогда обрящет милость, яко же и Петр по отречении. 

Книга о Вере, лист 110 и 116. Сия последния слезам достойная времена, вдашася широким путем в погибель ведущим, един другаго предваряюще, и от часу далие и глубочайше бежат в правду по Християнстей вере утвердитися, не к чему же иному да бежат точию к Писанию. Аще бо на ино взирати будут соблазнятся и погибнут. 

Соборник в неделю мясопустную. Слышащии Божественная Писания, и в руках тая имущии, и в мыслих всегда поучающеся, мнози прелести его убегнут, и в горах и в вертепах скрыются. 

О антихристе Ефрема [Сирина], Слово 105. Всем бо имущим благоведение Божие и разум тогда разумно будет пришествия мучителя. А имущим присно ум в вещех жития сего, и любящим земная неразумно се будет, привязани бо суть в вещех житейских. Аще и услышат слово, то не имут веры, но паче мерзит им глагол сей. 

Беседы Евангельские от Луки, зачало 87. Якоже бысть во дни Ноевы тако будет та во дни Сына Человеческаго, ядяху пияху женяхуся и посегаху. дондеже дне вниде Ной в ковчег и прииде потоп и погуби вся. Ниже: потому же будет и в День, вонь же Сын Человеческий явится, якоже бываему ковчегу невероваху. Тако и ныне явится антихрист по нем же скончание и муки нестерпимыя. Пиянством же злобы одержимы ниже ощутят страха бываемых, зане яко же оному потопу невероваше, тако и потопу гиены, всех, обножит, иже на здешния уповающих. 

Книга Андрея Юродиваго. Горко же тогда смирит сущия Христианы, до последняго издыхания, тогда иже не прельстится великими прельщении друг Христов, блажени бо суть, и болие блажени, и треблажени, иже при антихристе хощет мучен быти велика бо слава приимет их без конца. 

Апокалипсис, глава 12. Дуга знаменует Страшнаго Христа Бога, крепкое обещание Его яко ни един в гонении верный не погибнет. Смело иди на мучение полки Ангел посланы будут, на помощь верных ни погибнет. 

Библия, Пророка Ездры, глава 16. Востанут мнози на боящихся Господа, и расхитят стежание их. И от домов их изгонят. Тогда явится искушение, избранных Моих яко злато искусится от огня. И пред вами дни скорби, не бойтеся не сумнитеся яко Бог водитель ваш есть рече Господь, да не отягчают вас греси ваши. 

Апокалипсис, глава 6. Будет и чювственный глад обаче грешным, а праведным, яко Илию в пустыни вран питал, и вдовица, или яко Даниила в рове Аввакум, тако припетает в пустынях страждущих, имени его ради. 

Тифология. Аще кто и малым чем замарается то уже беси написуют на чале его отвержения Христа. Зрите, братие, аще и много понудят вас печать или карту прияти, то аще и кров пролияти, или имение лишитися, то с радостию притерпите, точию не мозите поклонитися многоперстой их прелести. За что веселие, воздояние будите пшеница царская. отдайте елико требоют, то ни есть замарание, но откупание, а они и сами от глада вскоре погибнут. без покаяния. 

Апокалипсис. Егда антихрист ополчится на Церковь, избранныя, поплевавше гражданския плища, и сметение и мирския сласти, в пустыню всякоя злобы, в плодоносное же всякоя добродетели жительство, побегнут, по Великому Мефодию. и тамо борущых бесов же и лукавых человек прилогов избежат.

(Источник: Книга «Цветник Духовный», [малый сборник], 

изд. XVII-XVII в., стр. 1-5).